Hjólað frá Bjarkarlundi til Flateyrar 2006; Hjólað frá Reykjavík til Ísafjarðar 2005

Þetta blogg er um hjólaferðalög okkar Guðbjarts um Vestfirði 2005 og 2006. Vonandi gengur að koma upplýsingum um ferðina ínná bloggið á leiðinni.

13 júní 2006

Áfangi 5: Svalvogar –Þingeyri-Flateyri

Vöknuðum uppúr kl 8 Mikil rigning var í nótt og hituðum við vatnið í morgunkaffið undir tjaldskörinni. Tókum síðan saman dótið og vorum komnir af stað fyrir kl 10. Nokkur vindur út úr Dýrafirði og dimmt yfir og rigning. Hiti ca 7-9° Vegurinn nokkuð blautur og þungur eftir rigninguna. Vegurinn er mishátt í hliðinni og margar brekkur sem þarf að leiða hjólin. Vorum komnir í GSM samband í Haukadalnum um kl tólf.

Vorum við þá búnir að ákveða að ljúka ferðinni á Þingeyri þar sem við nenntum ómögulega að halda áfram í rigningu og dumbung. Hringdi ég í Magna bróður og gat hann náð í okkur á sendlabílnum. Hittum við hann rétt utan við Þingeyri. Frá Þingeyri til Flateyrar eru ca 40km allt malbikað og vorum við komnir þangað um kl 14.00.

Tókum við allt dótið og settum í þurrk. Ég fór svo með flugvélinni heim um kvöldið en Guðbjartur verður áfram á Flateyri fram yfir helgina ásamt fjölskyndu sem kemur á föstudaginn.

Þetta var ágætis hjólatúr en veðrið hefði mátt vera betra þ.e. minni rigning. Allt annað en ferðin í fyrra þar sem var sólskin hvern einasta dag. Í ferðinni í fyrra hjóluðum nánast eingöngu á malbiki en núna var það öfugt. Vorum við nánast eingöngu á malarvegum og stundum engum vegi sbr milli Stapa og Hrafnabjarga. Þökkum við öllum sem aðstoðuðu okkur kærlega fyrir aðstoðina og sérstaklega Magna fyrir að hafa sótt okkur.

05 júní 2006

Áfangi 4 Út í Svalvoga


Komum um kl. 22.30 og búnir að tjalda í Höfnum sem er ytst á nesinu milli Arnarfjarðar og Dýrafjarðar. Þegar við vöknuðum í morgun sáum við að ekkert rignt um nóttina og létt upp þokunni sem var í gærkveldi. Við vorum eiginlega búnir að ákveða að stoppa ferðina í Mjólká ef haldið hefði áfram að rigna. Það er lítið varið í að paufast áfram í rigningu og og sudda. Ætlaði Magni bróðir að skutlast eftir okkur ef rigningin og dumbungurinn hefði haldið áfram. En sem betur fer var svo ekki. Við þökkum Orkubúi Vestfjarða og Steinari Stöðvarstjóra Mjólkárvirkjunar kærlega fyrir að hýsa okkur.
Við vorum bara klst. inn að Hrafnseyri. En eftir það hægðist ferðin þar sem vegurinn versnaði og þurftum við að vaða ár og læki. Ég ætlaði að hjóla yfir eina ána en það tókst ekki betur en svo að ég datt í henni miðri en tókst að redda mér þannig að ég blotnaði bara í lappirnar. Guðbjartur sá ófarirnar og klæddi sig úr sokkum og skóm og óð yfir... mun viturlegra
Þegar við komum í Stapadal tók við slóðin sem liggur í fjörunni fram hjá Stapanum. Þetta leit ágætlega út í byrjun en fljótlega hvarf vegurinn og í stað kom stórgrýtt fjaran þar sem öldur vetrarins höfðu eyðilagt veginn en á þessum stað þarf að gæta sjávarfalla (ca 2km). Var mikið verk að draga hjólin og vagnana yfir stórgrýtið. En yfir komumst við. Þá komum við á slóðan aftur. Hafði Geir frændi (sem vinnur hjá Vegagerðinni) deginum áður látið hreinsa slóðan fyrir okkur en mikið grjóthrun var á honum eftir veturinn. Það var mikill munur að komast á ruddan veginn. Þökkum við Vegagerðinni góða þjónustu.
Þegar við komum á slóðann sáum við að brekkurnar á Barðaströndinni eru ekkert brattar allaveganna ekki miðað við brekkuna sem lá upp úr fjörunni. Þar slitnaði keðjan á hjólinu hjá mér í átökunum en sem betur fer urðu engin meiðsli þó ég dytti á hausinn. Þegar við komum í Lokinhamra/Hrafnabjörg var farið að rigna en ennþá var stilla og 6-8° hiti. Fjöllin og fjaran en mikilfengleg þarna ytst á nesinu.
Þegar við komum í Hafnir var farið að hvessa í ofanálag við rigninguna og tjöduðum við í skjóli bak við Sumarbústað.

30 maí 2006

Áfangi 3: Dynjandisheiði.





Það var farið að rigna þegar við lögðum af stað frá Flókalundi en klukkan var þá um 11.30 Tókum til í farangrium áður en við lögðum af stað og skildum eftir ca 7kg af mat og öðru dóti. Við höfðum ekki samræmt innkaupin nægilega vel. Einnig þurftum við að hreinsa keðjuna á hjólunum þar sem mikill stirðleiki var kominn í gírskiptinuna vegna ryks og drullu. Við þurftum ekki að kíkja ákeðjuna í fyrra þar sem nánast öll leiðin var malbikuð.
Vegagerðin var að hefla og vatnsbera heiðina. Vegurinn var því mjög laus í sér og blautur og óðst upp. við urðum þess vegna að leiða hjólinn alla leiðina upp á háheiðina (500m). Þar hittum við Geir frænda Sigurðsson sem var að skoða aðstæður en hann vinnur hjá vegagerðinni. Tók hann dótið af vögnunum niður í Arnarfjörð fyrir okkur. Þá var kominn þoka, rigningarúði og hitinn 3-4 c. Við stoppuðum "sæluhúsinu" og fengum okkur að borða. Þar var frekar kuldalegt, snjóskafl á gólfinu.
Frá húsinu er hallar niður í Arnarfjörðinn. Eftir rigniguna og heflunina var vegurinn orðinn mjög gljúpur ( drullumall eins og krakkarnir segja ) sem mjög erfitt var að stýra í gegnum. Við vorum þess vegna útataðir í drullu þegar við komum niður í Dynjandisvoginn en fjallahjól eru ekki eins og flestir þekkja með bestu skítbrettin.
Fengum við inni íMjólkárvirkjun og settum sjálfa okkur og hjólin í smúlun og allt draslið í þurrk.

29 maí 2006

Áfangi 2



Erum núna í Flókalundi. Lögðum af stað frá Múla kl. 10.30 eftir ágætis hvíld í tjaldinu. Kuldaboli kom ekkert í heimsókn til okkar í nótt og var smá sólarglæta meðan við borðuðum morgunmatinn. Klettshálsinn er erfiður með vidinn í fangið og ansi brattur og tóku vagnarnir líka í. Við erum við erum sammála um að við séum með allt of mikið af mat og græjum með okkur. Þegar við komum yfir hálsinn var komið sólskin og ágætis veður sem hélst að mestu allan daginn. Norðanvindurinn út firðina var samt ansi stífur á köflum. Vegirnir þegar Klettshálsinum sleppir eru allir ómalbikaðir sem gerir að hristingurinn er mikill og eymslin í botnstykkinu í samræmi við það.
Verðum á hótel Flókalundi í nótt.


Vegurinn til vinstri liggur út í Skálmanes en sá til hægri liggur upp á Þingmannaheiði (jeppafær)

Áfangi 1




Erum komnir í Kollafjörð og tjölduðum rétt innan við Múla. Lögðum af stað frá Reykjavík um 11.30 á bílnum hans Guðbjarts. Dætur hans þær Kristín og Vala ásamt Sigmundi og Guðlaugu börnum Kristínar fóru með okkur og tóku bílinn til baka. Keyrðum við upp á Hjallaháls þar sem við ætluðum að skilja vagnana eftir en hálsinn er 350m hár. Við ætluðum svo að keyra til baka á byrjunarpunktinn sem er í botni Þorskafjarðar. þegar ég var að setja afturöxulinn sem notaður til að hengja vagninn á kom í ljós að hann var of langur og passaði engan veginn. Öxulinn hafði ég keypt í Erninum um um morguninn. Hann átti að vera með í vagninum sem ég fékk á leigu hjá Fjallahjólaklúbbnum en var ekki með. Við ákváðum að ég myndi fara til baka í Bjarkarlund og reyna að redda járnsög þar. Þetta reddaðist sem betur fer annars hefðum við lent í veseni því þá hefðum við einungis verið með einn vagn fyrir allan farangurinn og óvíst hvort það hefði gengið. Þar sem klukkan var orðinn rúmlega 5 ákváðum við að hjóla frá Hjallahálsinum. Vegurinn á Barðaströndinni frá botni Þorskafjarðar og að Múla hefur lítið breytst frá 1970. Það eru sömu hæðir og hólar, blind- beygjurnar og hæðirnar og fáránlega brattar brekkur.T.d. Er brekkan uppúr Djúpafirði yfir í Gufufjörð með 16% halla! Allt gerir þetta hjólreiðamönnum erfitt fyrir þar sem vegurinn er allur ómalbikaður í ofanálag. Það er mjög kalt 4-5 c og hvasst að norðan þegar við tjöldum en okkur tókst að finna smá skjól fyrir tjaldið.

25 maí 2006



Hér erBjössi að móttaka hið mikla rit "Garpar á ferð" vonandi verður lestur þess honum hvatning til mikilla afreka á sviði hjólamennsku í framtíðinni. Eftir þessa athöfn hjóluðum við út á Álftanes til Jóns. Þar var ekkert verið að hanga yfir málum heldur ákveðið að fara með í næstu ferð.

Kuldaboli að stríða okkur

Kuldaboli gæti sett strik í reikninginn hjá okkur Guðbjarti hvað hjólaferðina varðar. Það er allt of kalt til að við nennum að fara að hjóla allan daginn í 5 daga og tjalda svo í snjóskafli í lok hvers dags. En við sjáum til hugsanlega frestum við ferðinni fram yfir Hvítasunnu.

Dreifing á væntanlegri metsölubók ,,Garpar á ferð" hófst í síðustu viku og eru móttökur farmar öllum vonum og eftir spurn mikil. Það gæti svo farið að við neyddumst til að setja bókina á vefinn til að fá frið.

04 maí 2006

Þá er það ákveðið

Þá erum við Guðbjartur loks búnir að ákveða að skreppa í smá hjóltúr í sumar. Stefnt er á að nota fyrstu vikuna í Júní. Ætlum að byrja í Bjarkarlundi og hjóla westur fyrir og til Flateyrar. Ætlum að klára hringinn um Vestfirðina. Í stað þess að fara fyrir Hrafnseyrarheiði (550m) þá ætlum við að fara út í Svalvoga og inn Dýrafjörðinn. Við vitum svo af því að við eigum eftir að fara út í Látrabjarg og svoleiðis. Það kemur seinna.

Nú verðum við bara að vera duglegir í að æfa okkur. Höfum legið í leti lengst af í vetur. En þetta kemur vonandi allt.

Nú verðið þið lesendur góðir að vera duglegir að gefa komment og peppa okkur upp annars deyr þetta bara.

04 júní 2005

Góðar móttökur

Það var tekið vel á móti okkur á Ísafirði í gær þegar við renndum inn á Silfurtorg. þar var voru mætt:
Magni og Svana og Þórdís, Örn og Guðný, Gulli Jónasar, Snorri Hermanns, Helga Svenna og svo sjálfur alþingismaðurinn Einar Oddur Kristjánsson. Svo voru mættir stuðningsaðilar ferðarinnar þ.e. Eiríkur Finnur Greipson frá Sparisjóð Vestfjarða og Hilmar frá VÍS. Svo studdi Halldór Jónsson ehf og Nýherji hf ferðina.

Eftir að hafa farið í Olíusamlag Útvegsmanna þar sem Anna Lóa ræður ríkjum og fatað okkur upp og svo í heita pottinn á Seljalandi hjá Magna fórum við á Hótel Ísafjörð þar sem Samskip hélt "okkur" veglegt móttökuhóf þar sem mættir voru 150 manns í mat og drykk. Við þökkum Kristínu og Kristjáni fyrir höfðinglegar móttökur og það að sjá um flutning á hjólum og vögnum suður.

Í dag hjólum við svo í Kirkjuból í Bjarnadal (http://www.kirkjubol.net) og svo út á Flatreyri á heimaslóðir Guðbjarts þar sem við erum boðnir í hóf hjá Eiríki Finni.